下載王潮玩實錄 - $3,088 買港行 Nexus 9

$3,088 買港行 Nexus 9
iPad 勁敵最快兩星期有貨 

iPad Air 2 同 iPad mini 3 係香港有得訂，作為 Google「親生仔」的 Nexus 9 平板機都一樣有得訂。大家現時已可於香港 Play Store 中訂購 Wi-Fi 版，4G LTE 版則仍未有得訂，每個帳戶最多限售 2 台。雖然訂購要兩至三個禮拜才出貨，但總比買水貨機來得更穩陣。

講番大家最想知嘅價錢，Nexus 9 售價分別是 16GB Wi-Fi 版售 $3,088、32GB Wi-Fi 版售 $3,688；32GB 4G LTE 版售 $4,288，定價介乎於 iPad Air 2 同 iPad mini 3 中間，未知能否吸引更多遊離客戶。另外，Play Store 除有 Nexus 9 訂購外，亦已提供黑色、黃灰、綠藍 3 款保護套供用戶選購，每個售 $298，但暫時仍未有得訂。今次 Nexus 9 咁快就有得訂，未知嚟緊 Nexus 6 又會唔會咁快上架呢？

每個帳號最多限售 2 部。

Nexus 9 專用保護套亦已上架。

講完港行價錢，都要提一提 Nexus 9 的基本規格。這部由 HTC 生產的平板機採用 4：3 屏幕，擺明向 iPad「致敬」！不但價錢定於 iPad Air 2 及 iPad Mini 3 之間，就連 8.9 屏幕尺寸亦介乎兩者之間。解像度則為 2,048 x 1,536 pixels　　
Nexus 9 設有 3 種顏色供選擇，包括：黑、白、金，不過暫時香港 Play Store 上只有黑色供選購。處理器採用 NVIDIA Tegra K1、2GB RAM、800 萬像鏡頭等，其實跟小米平板規格頗相似。

白色 Nexus 9 香港未有得買住。

呢個原裝鍵盤套，香港又係未有得買住。

如果閣下本身已有 Nexus 7 或 Nexus 10 平板機，暫時不欲買新「親生平板」，仍可以率先享用 Android Lollipop，因為 Google 已表示上述兩款「親生舊機」的 Wi-Fi 版可以率先於下月初收到 OTA 更新。至於跟 Nexus 9 同日發佈的 Nexus 6 手機，雖未有港行訂購日期公布，但近日記者發現負責生產此機的 Motoroloa，在官網列出更詳細、Google 自己未有提及的規格，這包括：防水、2x2 802.11ac 對應等等。